Mark 6

1Esa fyewyi wa fa ekni dehi, wa O jeze lo wo ayi Nazarati ɓedo nwo abara yi. 2– 3N satiwyi yi wa lo aduwa nyakun, ntu ge wo wu nya, owo ɓeyekpe nwo aɓo wo-woyi zhin yi kwa wo aza, ntu ge wo ɓo zhin oza nu ngye ɓa. “Ɓa nya ge kafinta n Maryamu yi nugun nu to n, owo azaje nu to n Yakubu yi n Yusufu yi n Yahuda yi ɓedo n Simani yi n? Owo amapwi to bwa gni fi lo n ya n yi n.” To ca da ɓa m.

4Yesu wa ci ɓa ge “Anabi n mwamwa yi nna baho-baho yi, sai dai n wohin ayi nwo aza aba.” 5Ntu ɓa tna gaiciya ga ɓo, wo to ɓo mi wa zhin aɓo wo-woyi nɓa aba m, sai dai wo ɓo to anyasan yi bwa, wa ka ɓa gna. 6Ca wo wo ntu ɓa tna gaiciya ga ɓo. Wa gmiya wa lo azhi do wa wu ɓa nya. 7Wa yi awo-cei-aba, wa tnu ɓa ngun aba-ba, wa ga ɓa iko tu nna azafun nukwoi tukwo. 8– 9Wa gna ɓa ge ɓa to la nyahon, sai oɓa busi zanzan nya. Ɓa to la nyagyi n pwakun yi ko agywye ko abuada do ko eje do m.

10N fya lo ezhi fya ku bwa fi n puwa gmanyi har fya kun n zhihi. 11N fya lo ezhi nna to gwo fye ko a kna fya ɓeda tnubuan m, fya abwitukun luya nfye apita, fya kun, fya fa ɓa nɓa aɓoi.

12Owo abara ɓai gna zaho-zahoi nɓa gye, n ge wo la laifi fa. 13Ɓa kun alijanu ya n mwa, ɓa ka anyasan yi gna, ɓai shin ɓa zaitun mi.

Yohanna Fi

14Esa fyewyi Hirudus wa wo Yesu nabari, ntu ge a ɓei zhin ai da wo aɓo wo-woyi zhin ɓo abaho-bahoi. Esu wa zhin nubo ge ko Yohanna batizma zhin yi nu la laka n vigwo. Aza ci ge ashe ce nu zhin woi mi woi zhin aɓo wo-woyi. 15Azadoho ɓai gye ge Yesu zhin Iliya nu, ko anabi kwoi-kwoi ho nu la laka n vingwo. Azadoho ɓa gye ge anabi woi-woyi ho nu ngye anabi dnagmayi ho.

16Hirudus wa ci ge awo, “Yohanna nu eza nmi ɓei la wo tukwo zunya, wola laka n vingw.”

17– 18Ntu ge Hirudus ɓei la Yohanna wan, wa wo dna n kurkuku, ntu ge wo ɓo zhin woi gna wo ge kwo to bmiya lo wa la Hirudiya owo zado Filibbus nyikwo m. 19Hirudiya ɓo cei pma a Yohanna wu, ama wo to ɓo mi wa zhin lo nu to Hirudus woi ye m. 20Hirudus ɓei zhin woi ga Yohanna mwa-mwa, woi kpe ge wo zhin oza befyecei nu nza gyi-gyi-yi, wa wo kna. Wo ɓei zhin woi ye wa wo Yohanna ɓeda, ama shi wo ku wo kwa gna wo gna-gna nwo mi.

21Hirudiya sa ɓewo Hiridus mama nyipyeyi kwa shegundo wa yi aza agmada zhin n wo puwa, owa bmazhinyi, asoja tukwoda, n na za dnagmai yi n ɓa knu Galili. 22– 23Hirudiya nyrgnu wa nya-nya nɓa bye har kwa da ɓa gma vinya. Esu wa zhinwo alkawali ge ntu onya ɓo nwa nya nyi, wo ɓa gawo nyahonyahoi n woye. “Kwo emi kni, ma gna kwaje ma gaho tokun yi.”

24Wa gmiyalo wa nya wo ʼya, nya kwo bmiya wa nyaɓo. Owo ʼya wa gna wo ge, “Lo ho gna ho ye Yohanna Baptisma zhinyi tukwo nu.”

25Wa je zelo osu aba npye wa gna woge, “Miye Yohanna Batisma zhin yi tukwo n sayiye tu n fintala.”

26Kwa gna esu gna-gna, ama kwa wo-wo shan n wo ɓa bma wo alkawali ya na ʼza bye nyi. 27Wa tnu wo guyi ge, wo lo wo ɓe n Yohanna tukwoyi. Soja yi, Wa lo kurkuku wa zun Yohanna tukwo. 28Wa ɓe ceyi shi ntu fintala, wa ga ɓinyikwoyi wa lo wo ʼya ceyi.

29Sa n Yohanna bara ɓei wo nya kwa zhin, ɓa lo ɓa la Yohanna nahi ɓa bikwo dna vingwo.

30Yesu a bara jezeɓe waba ɓa gna wo a tnu-tnu vinya ɓa zhin n nyayi n ɓa gnaza nɓa ɓei lo ɓa aba nyi.

Yesu Wa Ga Aza Dubu Ngun Atnu Nyagyi

31Nnavun Yesu wa gna ɓa ge ɓa kuka naza ʼba ɓalo ɓa ku sun, ntuge aza mwa-begye ɓai ɓe ɓai lo, to ɓa bwasa ɓa gyi nyagyi m. 32Ɓa kuka fi n ʼya ɓa lo abado n ɓa ɓei wo pyipyi-pyi 33Ama aza mwa begye ɓa ku gye ɓai lo, aza she ɓa kpe ɓa busilo ɓa sun ɓai, ɓai kazhi n ʼya. 34Aza yezhi shi ɓa zhin ɓa shin yezhi, kafin wo kashi n ʼya. Wa gye ɓa sun-sun n tuge ɓa ɓei zhi n gye akni n ɓato knayi yim, Wa wuɓa anya mwa begye n kwo ɓei bmiya ɓa kpeye. 35– 36Nwyesheyi, owo abara ɓa gna wo ge, “Gna aza ɓa lo ezhi ɓiyi ɓa si nyagyi, n tuge nyagyi to lo n bmana ye a gyi m, sukwo nyi bwa ɓe-ɓe nu.” 37Ama Yesu wa gnaɓa ge, “fye ga ɓa nyagyi,” Ɓa cige, “N kni nyi ya? Ntuge kwo ɓa dnaɓo za mi wa si nyagyi ga za n mwabegye layi.”

38Yesu wa nyaɓa, “Yi nyagyi shi lo mwa? Fye lo fye kpe ge-nyi.” Ɓa jeze ɓe ɓa gnawo ge, “Bredi lo ngnu atnu n na wyesala yi ngnu aba.” 39– 40Yesu wa gna aza ge ɓaku sase, safyewyi aza sase zhi shitnu-shitnu, tagyi-tagyi kpe na gbe-gbe. 41Wa ku bredi ngnu atnu ho, n wyisala ngnu aba hi Wa kpe wye wushe Wa zhin godiya ntu nyagyi ɓo. Wa gna wa bara bredi n na wyisalayi ɓa gnaza. 42Aza gyi har nubo kwa fuɓa, to ɓa shan mi gyi m.

43– 44Aza ɓei nyi dubu ngnu atnu (5,000) n ɓa ɓei gyi nyagyi nyi, n na vun a ye awyiwoyi zhi, a ceknu awocei-aba. 45Nsayi Yesu wa gnawo abara ge ɓa lo ʼya ɓa jezelo Basaida Wa kmaɓe daɓa. Wohin woɓa cegni wa gna za mi.

46Ndeye avun wa lo epe wa zhin aduwa. 47Nsukwoyi owo abara yi fi n ʼya, n kpe n ʼla tasin, woi ce tu nkma n Wo gmanyi yi. 48Wa gye ɓa fi n wahala dnagmayi ɓai gye azhin a nuwan dokwo yi, n ʼseyi, Wa zan-zan lo da ɓa tu nuwan ʼshe har Wa ya ɓa diya. 49Ama shi ɓa ɓei gye nyaho kwoi zan-zan lo n ɓa bmayi, ɓa fyaku n dnayi ɓai gye ge nya-subwi nu. 50Ɓa ku gyewo vinya. Wa daɓo ɓai n sagmanyi yi, “Emi nu! Fye to wo dna m!” 51Wa lo ʼya daɓa ese kwa ce pyi-pyi-pyi. Ba sase fi n ʼya to ɓai mi ɓedam. 52Har sayi ye, ɓa to ɓei ye kpe Wo ye, du na ɓo awo-woyi n Wo ɓei yi ku zhin nwyeshe yi nyi, ntuge ɓa to ɓei cei pma ɓa ga gaiciya m.

53Sanu ɓa ɓo kusi Janisarata kni ɓa kpe eya gni n nuwan gbe. 54N wo kakashiyi, aza n ɓa ɓei zhi nabayi, ɓa kpewo ye n sa gmanyi yi. 55Ɓa busi laɓa ɓai gna ʼza ge Yesu laɓe, ɓa ya anyasanyi ku lowo ceyi kpe na pece. 56Esa n Walo a kauye, n na zhi yakwo yi, n na fwa yi, ɓa ku a-nyasan yi lo wo cei na zokwo n na gnikwo bayi, ɓa yi wo wye ge wo fwa ɓa towo ejekpe bwa kawai shi a za ɓei to wo bwa n sun ɓa bwa kagna.